កំពង់ឆ្នាំង៖ គ្រឿងញៀន និងសារធាតុញៀនចំនួន ៤ ៧៨០គីឡូក្រាម ដែលអាជ្ញាធរខេត្តកំពង់ឆ្នាំងបង្រ្កាបបាន ត្រូវបានប្រមូលយកមកដុតបំផ្លាញចោលនៅថ្ងៃទី២៩ ខែសីហា ឆ្នាំ២០២៣។
ពិធីដុតបំផ្លាញគ្រឿងញៀនទាំងនេះ គឺធ្វើឡើងក្រោមអធិបតីភាពរដ្ឋលេខាធិការនៃរដ្ឋមន្ត្រីក្រសួងយុត្តិធម៌ អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ និងភាគីពាក់ព័ន្ធផ្សេងៗទៀត។
ពិធីដុតបំផ្លាញគ្រឿងញៀននេះក៏ធ្វើឡើងដើម្បីអបអរសាទរ «ទិវាអន្តរជាតិប្រយុទ្ធប្រឆាំងគ្រឿងញៀន» ថ្ងៃទី២៦ ខែមិថុនា ឆ្នាំ២០២៣ ក្រោមប្រធានបទ «អ្វីៗដើម្បីប្រជាជនជាចម្បង បញ្ឈប់ការរើសអើង និងមាក់ងាយអ្នកញៀនគ្រឿងញៀន ពង្រឹងការអប់រំ»។
គ្រឿងញៀន និងសារធាតុញៀនជិត ៥ពាន់គីឡូក្រាមនេះ ត្រូវបានរឹបអូសតាមអំណាចសាលក្រមស្ថាពរ លើសំណុំរឿងគ្រឿងញៀនស្ថិតក្រោមសមត្ថកិច្ចនៃសាលាដំបូង និងអយ្យការអមសាលាដំបូងខេត្តកំពង់ឆ្នាំងចំនួន ៨៧ សំណុំរឿង។
ទន្ទឹមគ្នានេះដែរ ខាងខេត្តត្បូងឃ្មុំក៏បានប្រារព្ធពិធីដុតបំផ្លាញគ្រឿងញៀនជាង ៨គីឡូក្រាម ដែលបង្ក្រាបបាននៅក្នុងខេត្តទាំង៣ នាពេលកន្លងមកផងដែរ៕
